Policia në Ferizaj përmes një komunikatë për media ka bërë të ditur se drejtori Rajonal, nënkoloneli Basri Shabani ka thirrur sot në takim mujor të gjithë komandantët e stacioneve policore, shefat e njësive rajonale dhe atyre të centralizuara, në mënyrë që të prezantojnë analizën e raportit mujor për muajin shtator të vitit 2021, në krahasim me muajin shtator të vitit 2020.

Në këtë takim është diskutuar edhe për situatën e sigurisë, e cila është vlerësuar e qetë në rajonin e Ferizajt, transmeton arbresh.info

Njoftimi i plotë:

Drejtori Rajonal, Nënkoloneli Basri Shabani, ka thirrur sot në takim mujor të gjithë komandantët e stacioneve policore, shefat e njësive rajonale dhe atyre të centralizuara , për të prezantuar analizën e raportit mujor për muajin shtator të vitit 2021, të krahasuar me muajin shtator të vitit 2020.

Në këtë takim , veç tjerash është diskutuar situata e sigurisë, e cila është vlerësuar e qetë në rajonin e Ferizajt.

Në muajin shtator të vitit 2021 është shënuar rënie të krimit në përgjithësi , krahasuar me muajin shtator të vitit 2020 :

Krimi në përgjithësi ka shënuar rënie nga 325 raste në 322 , apo – 0.9 %

Veprat penale nga 269 në 238, apo -11.5 %

Edhe sa i përket krimeve kundër pasurisë kemi pasur rënie të këtyre veprave :

Vjedhjet e rënda nga 27 në 21 apo -22.2 %

Vjedhjet nga 57 në 37 apo – 31 . 1 %

Gjithashtu ka pas disa aktivitete të shtuara në arrestimin e personave të kërkuar nga policia dhe me urdhëresë të gjykatave .

–           Arrestime nga 38 në 51 persona , apo + 34.2 %

–           Urdhëresa të realizuara të gjykatës nga 167 në 279 , apo 42.9 %

Ndërkaq, është paraqitur nevoja që të shtohen aktivitetet dhe masat e policisë në disa fusha, me theks të veçantë,  parandalimin e aksidenteve në komunikacion, vazhdimin e aktiviteteve të policisë me automjete dhe rroba civile në identifikimin e kundërvajtësve të ndryshëm në lokacione të ndryshme.

Nga 89 aksidente sa kanë ndodhur në shtator të vitit 2020 ,  në shtator të vitit 2021 kanë ndodhur 113 , apo rritje për  + 27 %

Ndërsa sfidë për policinë rajonale është vlerësuar të jetë Pandemia Covid-19 , e cila po kërkon angazhim për policinë 24 orë në ditë.

Po ashtu nga komandantët e stacioneve dhe shefat e njësive rajonale, është kërkuar që të shtohen aktivitetet e policisë edhe në fusha tjera, sipas Strategjisë së Integruar të Policimit të Drejtuar nga Inteligjenca dhe Policimit në Bashkësi, 2021-2025, referuar  Planit të Veprimit, siç parashihet më këtë strategji : në grumbullimin e informacioneve për vjedhjet dhe vjedhjet e rënda , grabitjet, krimin e organizuar fajdetë, drogat, informacione rreth dukurive negative rreth shkollave, informacione rreth kapjes së personave të kërkuar me urdhëresë nga gjykata etj .

Në fund të këtij takimi u përcaktuan edhe prioritetet e policisë rajonale për ditët në vijim , që rajoni ynë të kalojë pa incidente dhe aksidente në komunikacionin rrugor.